அந்த இளம் விதவையிடம்…

“என்னடா, திருட்டு முழி முழிக்கறே? யார் கிட்டேர்ந்து லெட்டர்?”

“வக்கீல்”

“வக்கீலா.. . யாரோட வக்கீல்?”

“சரோஜாவோட வக்கீல்”

“எந்த சரோஜா?”

“சிக்கல். நாகப்பட்டினம் பக்கத்திலே சிக்கல்…”

“சி…சிக்கல்லேர்ந்து வக்கீல் நோட்டீசா…பேரென்ன சொன்னே?”

“சாம்பசிவம்”

“கிளையன்ட் பேரு..”

“சரோஜா”

“என்னவாம்?”

“செத்துட்டாளாம்”

“என்ன!”

“ஏன் பதர்றே? உனக்குத் தெரியுமா?”

“இ…இல்லே… எனக்கெப்படித் தெரியும்..”

“போன மாசம் என் கிட்டே காரை இரவல் வாங்கிட்டுப் போனியே, எங்கே போனே?”

“வைதீஸ்வரன் கோயில்”

“வேறே?”

“வேறே எங்கயும் போகல்லையே?”

“சிக்கல் போகல்லே?”

“இல்லையே?”

“சிக்கல் கோயில்லே காரை பார்க் பண்ணின ரசீது இருக்கே?”

“செத்தே போய்ட்டாளா? நான் ஒண்ணுமே பண்ணல்லையே?”

“சோ நீ சிக்கல் போயிருக்கே”

“அ… ஆமாம்…”

“அந்த சரோஜா வீட்டிலே தங்கியிருக்கே”

“ஆமாம்”

“தனியா இருந்த அந்த இளம் விதவை கிட்டே தப்பா நடந்திருக்கே”

“இல்லே… நடந்த எல்லாமே அவ சம்மதத்தோடதான் நடந்தது”

“ஏன் பின்னே பொய் சொன்னே அவ கிட்டே?”

“பொய்யா… எந்தப் பொய்யும் சொல்லல்லியே?”

“உன் பேரை மாத்தி சொல்லி என்னோட விசிட்டிங் கார்டைத்தானே குடுத்தே?”

“………………………………………”

“நல்லா திறமையாத்தான் பண்ணியிருக்கே. என்காரை எடுத்திக்கிட்டுப் போய், பார்கிங்க்லே ரசீது வாங்கி ஆதாரம் உண்டாக்கி, கார்லே இருந்த என் விசிட்டிங் கார்டை கொடுத்து….”

“சாரிடா, இதெல்லாம் நான் திட்டம் போட்டு செய்யல்லே. சும்மா தப்பிக்கறதுக்காக பண்ணிட்டேன். இப்ப என்ன ஆகும்? நீ மாட்டிக்குவியா?”

“உனக்கு அலிபி இருக்கா?”

“இல்லையே?”

“கவலைப்படாதே. கிரியேட் பண்ணிடலாம். ஒரே ஒரு வேலை மட்டும் பண்ணு. எனக்கு எதுவும் தெரியாது, இது எல்லாத்துக்கும் முழுப் பொறுப்பு என் நண்பந்தான்னு என் பேரை எழுதி கொடுத்துடு. இந்தா பான்ட் பேப்பர். ரெண்டு விட்னஸ் கிட்டே நான் கையெழுத்து வாங்கிக்கறேன். ரிஜிச்டரும் பண்ணிடறேன்”

“பயமா இருக்கு. இந்தாடா… நீ சொன்ன மாதிரியே எழுதிட்டேன். நீ எப்படி தப்பிக்கப் போறே?”

“நான் ஏன் தப்பிக்கறேன். நாந்தான்னு நீ எழுதியிருக்கே, நானும் அதை ஒத்துக்குவேன்”

“ஐயய்யோ, அப்புறம்?”

“செத்துப்போன இளம் விதவைக்கு ரத்த புற்று நோயாம். சொந்தக்காரங்களே கிடையாதாம். நூத்தி இருபது ஏக்கர் நிலமும், நாலு வீடும் இருக்குதாம். நடந்தது தப்போ சரியோ அந்த ராத்திரி நான், அதாவது என் பேர்லே போன நீ சொந்தமாயிட்டேனாம். மொத்த சொத்தையும் என் பேர்லே எழுதி வெச்சிருக்கா. அதைத்தான் வக்கீல் எழுதி இருக்காரு”