உண்ணாவிரதம்

இங்கேதான் இருக்கு ஸ்பெக்ட்ரம் பணம்

ஷாப்பிங் மால்களில் சுற்றித் திரிவது கூட ஒரு யோகப் பயிற்சிதான்.

பர்ஸில் கையே வைக்காமல் வெளியே வந்து விட்டால் நீங்கள் ஆசைகளைத் துறந்த பெரும் துறவி என்பது திண்ணம். – இது ஒரு பொதுவான விதிதான்; பெங்களூர் ஷாப்பிங் மால்கள் முற்றிலும் வேறுபட்டவை.

 சென்னையிலும் ஸ்பென்ஸர், ஸ்கைவாக், சிட்டி செண்ட்டர் உள்ளிட்ட பல இடங்களில் சுற்றியிருக்கிறேன். சென்னையில் இரண்டு வகை மக்களைப் பார்க்கலாம். (அ) சும்மா சுற்றிவிட்டுப் போய்விடுகிறவர்கள், (ஆ) பொருட்களை வாங்குகிறவர்கள். சென்னையில் வாங்குகிறவர்களை தேவைக்கு வாங்குபவர்கள், ஆசைக்கு வாங்குகிறவர்கள், ஆடம்பரத்துக்கு வாங்குகிறவர்கள் என்று மூன்று வகைகளில் பிரித்து விடலாம்.

 பெங்களூரில் இன்னொரு ஜாதி இருக்கிறது.

 செலவு செய்பவர்கள்!

 அவர்கள் வாங்கும் பொருட்களில் தேவை, ஆசை, ஆடம்பரம் எல்லாம் கடந்து, செலவு செய்தாக வேண்டுமே என்கிற அவசரமும், பதற்றமும் மட்டுமே தெரிந்தது. என்னென்னவோ வாங்குகிறார்கள்.. விலையைப் பார்ப்பதே இல்லை. விலை என்பது வாங்கும் பொருளுக்கு ஒரு கிரைட்டீரியா என்று சொன்னால் கூட சிரிப்பார்கள் போலிருக்கிறது.

 பெங்களூர் ஃபீனிக்ஸ் ஷாப்பிங் மாலில் கொஞ்ச நேரம் சுற்றிக் கொண்டிருந்த போது ஸ்பெக்ட்ரம் பணம் பூரா பெங்களூரில்தான் புழங்குகிறதோ என்கிற சந்தேகம் வந்தது. ஃபீனிக்ஸிற்கும் இதர ஷாப்பிங் மால்களுக்கும் இருக்கும் அடிப்படை வித்யாசம், இருக்கிற ஃப்ளோர் ஏரியாவில் 25% இல்தான் கடைகள்; பாக்கி ஸ்பேஸ் பூரா விலாஆஆஆஆசமாக சும்மாவே இருக்கிறது.

இவ்வளவு இடத்தை வீணாக்கியிருப்பதிலேயே பணத் திமிர் தெரிகிறது. அந்தக் கேம்பஸில், வெளியே சும்மா இருக்கிற இடத்தை அன்னா ஹஸாரே குரூப்புக்கு உண்ணாவிரத ஷோவுக்கு வாடகைக்கு விடலாம். அப்போதும் ஒரு ஐம்பது சதுர மீட்டராவது ஃப்ரீயாக இருக்கும்.

 அங்கே இருந்த செறுப்புக் கடைகளில் என்ன விலை ரேஞ்ச் என்பதை நீங்கள் புரிந்து கொள்ள ஒரு உதாரணம் சொல்கிறேன். (பிடிவாதமாக என் மகன் வாங்கிக் கொடுத்த) செறுப்புக்கு அவர்கள் தந்த 20% கழிவுதொகை நான் ஏற்கனவே உபயோகித்துக் கொண்டிருந்த செறுப்பின் விலையை விட 30% அதிகம்!(என்னை பெங்களூர்காரர்கள் பட்டியலில் சேர்க்க வேண்டாம். அறுந்த செறுப்புடன் போயிருந்தேன்) ஆயிரத்தி எண்ணூறு ரூபாய் விலையுள்ள செறுப்பை, ‘இதெல்லாம் கேஷுவல் வேர் சார். உள்ளே அந்தப் பக்கம் பாருங்க, நல்ல வெரைட்டி இருக்கு’ என்றார் கடைக்காரர்!

 புடவைக் கடைகளில் 51% கழிவு போக (சிந்தட்டிக்) புடவைகள் விலை நாலாயிரம். சரவணா ஸ்டோரில் அறுநூறு ரூபாய்க்கு விற்கும் புடவைக்கும் இதற்கும் சத்தியமாக என் புடவை ஞானசூன்யத்துக்கு வித்யாசம் தெரியவில்லை. ‘சாரி ஃபால் நல்லா இருக்கும் சார்’ என்றாள் விற்பனைப் பெண். சாரி ஃபால் ஆகாமல் இருப்பதுதானே கௌரவம் என்று கேட்க நினைத்து அடக்கிக் கொண்டேன்.

இங்கெல்லாம் பொருள் வாங்குபவர்களை சிம்பாலிக்காகச் சொல்கிறார்களோ?

 ரெஸ்டாரண்ட்டில் மட்டும், சென்னை ஓட்டல்களின் பகல் கொள்ளையை விட அதிக வித்யாசமில்லை. அமெரிக்க ஃபுட் கோர்ட்களிலும் அதே விலைதான் என்று இல்லத்தரசி தெரிவித்தார். வேலைக்கு இருக்கும் கோர்காலேண்ட் பையன்களுக்கு சாதா தோசை, ரவா தோசை, மசால் தோசை இவற்றுக்கிடையே இருக்கும் வேறுபாடுகள் தெரியாததால் அடிக்கடி தப்பு டெலிவரி செய்கிறார்கள். எங்களிடம் அவன் செய்த தப்பில் ஓட்டலுக்கு அறுபது ரூபாய் நஷ்டம்.

இந்தியன் தாத்தா அன்னா ஹஸாரே

கலக்கிக் கொண்டிருக்கிறார் அன்னா ஹஸாரே!

இந்தியன் படம் பார்க்கிற போது இப்படி ஒரு தாத்தா நிஜமாகவே உருவானால் பரவாயில்லையே என்று உங்களை மாதிரியே நானும் ஏங்கினேன்.

ஷிவ் கேராவின் ஃப்ரீடம் இஸ் நாட் ஃப்ரீ படித்துக் கொண்டிருக்கிறேன். தேர்தலில் வோட்டுப் போடுமுன் எல்லாரும் படிக்க வேண்டிய புத்தகம். அதைப் படிக்கிற போதும், ஏன் நம் நாடு இப்படி அழிந்து கொண்டிருக்கிறது, விடிவே இல்லையா என்கிற ஏக்கம் ஏற்படுகிறது.

அன்னா ஹஸாரே பற்றி தொலைக்காட்சியில் பார்த்ததும் சந்தோஷமாக இருக்கிறது. இவர் சுபாஷ் சந்திர போசின் இந்தியன் தாத்தா அல்ல, காந்தியின் இந்தியன் தாத்தா. ஆனால் அரசியல்வாதிகளின் ஆணவமும், மெத்தனமும் இவரை மாற்றினாலும் ஆச்சரியப்படுவதற்கில்லை.

இந்திய ராணுவத்தில் பணியாற்றி ஓய்வு பெற்றவர், Right To Information Act (RTI) வருவதற்குக் காரணமாக இருந்தவர்.

அன்னா ஹஸாரேக்கு பல்வேறு மாநிலங்களில் ஆதரவு தோன்றியிருக்கிறது. அவர்களில் பெரும்பாலோர் இளைஞர்கள். கிரன் பேடி உள்ளிட்ட ஐஏஎஸ், ஐபிஎஸ் அதிகாரிகள் ஆதரவு தெரிவித்திருக்கிறார்கள். தேசத்தில் நல்லது நடக்கிற வாய்ப்புக்கள் தெரிகின்றன.

லோக்பால் பில் என்றால் என்ன?

லோக்பால் என்பது ஏதாவது ஜவுளிக்கடையின் பேரா?

லோக்பால் என்பது உச்சநீதி மன்றத்தின் தலைமை நீதிபதியைத் தலைவராகக் கொண்டு, குறைந்த பட்சம் உயர்நீதி மன்றத் தலைமை நீதிபதியாக இருந்த அல்லது இருக்கிற மேலும் இரண்டு நீதிபதிகளையும் உறுப்பினர்களாகக் கொண்ட ஒரு குழு.

எந்த இந்தியப் பிரஜையும், பிரதமர் உள்ளிட்ட எந்த அமைச்சர் மீதும் இங்கே புகார் தரலாம். அந்தப் புகார்கள் ஆறு மாதங்களுக்குள் விசாரிக்கப்பட்டு நடவடிக்கை எடுக்கப்பட வேண்டும்.

1968ல் இப்படி ஒரு அமைப்பு முன்மொழியப்பட்டு, 1969 லேயே பாராளுமன்றத்தில் ஒப்புதல் பெறப்பட்டு விட்டது. ஆனால் எந்த அரசும் (இன்றைக்கு ஆதரவுக் குரல் எழுப்பியிருக்கும் பிஜேபி அரசு உள்பட) இதை நடைமுறைப்படுத்தவில்லை.

42 வருஷங்களாகக் கிடப்பில் போடப்பட்ட இந்த விஷயத்தை உடனே முடிவுக்குக் கொண்டுவரவேண்டும் என்பதே அன்னா ஹஸாரேயின் கோரிக்கை.

முதலில் அன்னா ஹஸாரேயின் செயலை இம்மெச்சூர் என்று காங்கிரஸ் வர்ணித்தது. பிறகு கொஞ்சம் காத்திருக்க வேண்டும், உண்ணாவிரதத்தைக் கைவிடுங்கள் என்று கேட்டுக் கொண்டது. பிறகு வீரப்ப மொய்லி அவர்கள் அடுத்த பார்லிமெண்ட் செஷனில் கொண்டுவருகிறோம் என்று உறுதி அளித்தார். எதற்குமே அன்னா மசியவில்லை. ஷரத் பவார் லோக்பால் குழுவிலிருந்து ராஜினாமா செய்தார். ம்ஹூம்…..

மெச்சூராக இருப்பது என்றால் என்ன?

இந்தியாவின் கறுப்புப் பணம் கோடிக்கணக்கில் ஸ்விஸ் வங்கியில் இருப்பதும், நூறு வருஷத்து இந்திய பட்ஜெட் அளவுக்கு 2ஜியில் திருடப்பட்டிருப்பதும் தெரியவே தெரியாத மாதிரி உட்கார்ந்திருப்பதா?

அன்னா ஹஸாரேக்கு ஆதரவு தருவதாகச் சொல்லிக் கொண்டு வந்த அரசியல்வாதிகளை ஆட்டத்தில் சேர்க்கவில்லை மக்கள். உமாபாரதியையும், சௌதாலாவையும் அப்படியே வண்டியேற்றி அனுப்பிவிட்டார்கள்.

கிடைத்துவிட்டார் இரண்டாவது காந்தி.

அவரைப் பொன் போல் பாதுகாத்து வைத்துக் கொள்ள வேண்டியது நம் கையில்தான் இருக்கிறது.