போலிச் சாமியார்களுக்கு சில யோசனைகள்

போதனை செய்கிற போது மொட்டைத் தலையும், மழுங்க சிரைத்த முகமுமாக வந்து விட்டு, ஜில்பான்ஸ் வேலைகளுக்காக விக், மீசை எல்லாம் வைத்துக் கொள்ளலாம். உடையையும் லுங்கி முண்டா பனியன் என்று மாற்றிக் கொள்ளலாம். இதனால்,

வீடியோ எடுக்கப் பட்டால் அது நான் இல்லை என்று சொல்லலாம். ஜாடை இருப்பது தெரிந்தால் அவன் என் தம்பி என்று சொல்லலாம்.

சொற்பொழிவின் போதே இளம் பெண்கள் புடை சூழ, அவர்களின் பணிவிடைகளோடு மேடையில் தோன்றலாம். அவ்வப்போது அவர்களைச் செல்லமாகத் தட்டி ஆசி சொல்லலாம். இதனால்,

வீடியோ பார்க்கும் போது பெரிய வித்யாசம் எதுவும் தெரியாது.

படுக்கையில் கொசுவலை கட்டிக் கொள்வது மிகவும் நல்லது. கொசுவும் வராது வீடியோவிலும் ஒரு இழவும் விழாது.

படுக்கப் போகும் போது பளிச்சென்று மேக்-அப் போட்டுக் கொள்ளலாம். ஒவ்வொரு ஜில்பான்ஸ் செயலுக்குப் பிறகும் ஒரு முறை உரக்க “கட்” என்று சொல்லலாம். இதனால்,

சினிமாவுக்கோ, சீரியலுக்காகவோ எடுக்கப் பட்டது என்கிற பிரமையை உண்டாக்கலாம்.

அவ்வப்போது ‘இன்பவேதனாயோகா’, ‘இந்திரியச்செக்லோயோகா’,’இளம்பென்சிள்மிஷ்யோகா’,’இச்சுத்தாயோகா’ என்று தேங்காய் சீனிவாசன் பாணியில் உளறிக் கொண்டே இருக்க வேண்டும். இதனால்,

ஏதோ விசேஷமான யோகப் பயிற்சி தந்து கொண்டிருந்ததாகக் கூறலாம்.

ஆசிரமத்துக்குள் வரும் பெண்கள் எல்லாருமே ஆம்பிளை உடையில், மீசை ஒட்டிக் கொண்டுதான் வரவேண்டும் என்று சொல்லி விட வேண்டும். யாருக்கும் சந்தேகம் வராது, வீடியோ எடுக்கிற ஆர்வமும் வராது.

தடக்கென்று பூமிக்குள் போகிற கட்டில், ஜன்னல் ஓரங்களில் பிடரியில் அறைகிற செட் அப், காமிராக்களை செயலிழக்கச் செய்கிற சக்தி வாய்ந்த காந்த மண்டலங்கள், வெளிப்பக்கம் முழுக்க மிளகாய்த் தூளை காற்றில் தூவி விடுதல் உள்ளிட்ட யுக்திகள் வீடியோ எடுக்கிறவர்களை டென்ஷன் செய்யும்.

ரோஜர் மூர் படம் போல ஆசிரமத்தைச் சுற்றி பதினெட்டடி அகலமும் இருபதடி ஆழமும் இருக்கும் அகழி அமைத்து அதில் முதலைகளை நீந்த விட்டு பாதுகாப்பை உறுதி செய்யலாம்.

ஆசிரமத்தில் எப்போதும் ஆகாத சுருதியில், கர்ண கொடூரமான குரலில் ஒருவரை பஜனைப் பாடல்களைப் பாடச் செய்வது அந்தப் பக்கம் தலை காட்டவே பயப்பட வைக்கும்.

அரசாங்கத்துக்கு யோசனைகள் நாளைக்கு….